हाम्रो ईतिहास

क्वयेर युथ ग्रुप नेपालमा क्वयेर व्यक्तिहरूको अधिकार, मर्यादा र समावेशीकरणका लागि वकालत गर्ने युवाहरूको नेतृत्वमा सञ्चालित एक मुनाफा-रहित संस्था हो। सन् २०१८ डिसेम्बर ५ मा रुक्शना कपाली, दिपेश श्रेष्ठ र बादल लामा (सफल) द्वारा स्थापना गरिएको यस समूहले सुरुमा लैङ्गिक तथा यौनिक अल्पसङ्ख्यक आन्दोलनमा युवाहरूका लागि नेतृत्वको अवसर सिर्जना गर्न एउटा खुल्ला सञ्जालको रूपमा काम सुरु गरेको थियो। सन् २०२० मा यो औपचारिक रूपमा मुनाफा-रहित संस्थाको रूपमा दर्ता भयो।

हाम्रो मूल विश्वास यो हो कि यौन अभिमुखीकरण, लैङ्गिक पहिचान र यौन विशेषता (SOGIESC) एक विस्तृत दायरामा अवस्थित हुन्छन्। यी पहिचानहरू परिवर्तनशील हुन्छन् र यिनलाई कहिल्यै पनि संकुचित घेराभित्र सीमित राख्नु हुँदैन। क्वयेर युथ ग्रुपले एक अन्तरसम्बन्धित दृष्टिकोण अङ्गाल्छ, जसले क्वयेर व्यक्तिहरूले भाषा, जातजाति, छालाको रङ्ग, भूगोल, अपाङ्गता, जाति, सामाजिक र आर्थिक अवस्थाका आधारमा विभिन्न तहगत चुनौतीहरूको सामना गर्नुपर्छ भन्ने कुरालाई स्वीकार गर्दछ। हामी केवल यौन अभिमुखीकरण, लैङ्गिक पहिचान र यौन विशेषताका आधारमा हुने भेदभावलाई मात्र नभई, यस्ता अन्तरसम्बन्धित दमनका प्रणालीहरूलाई सम्बोधन गर्न प्रयत्नशील छौँ।